130-vjetori i lindjes së Osman Myderrizit

Akademia e Shkencave e Shqipërisë, ditën e enjte më 29 prill 2021, ora 11.00, do të organizojë veprimtarinë “Në përkujtim të studiuesit të shquar Osman Myderrizi, 130-vjetori i lindjes (1891–1973)”.

Veprimtaria do të mbahet me pjesëmarrje fizike dhe online në sallën “Aleks Buda” dhe do të hapet nga akad. Pëllumb Xhufi Kryetar i Seksionit të Shkencave Shoqërore dhe Albanologjike.

Do të kumtojnë:

-Prof. Seit Mansaku: Vepra gjuhësore e prof. Osman Myderrizit

– Prof. Ferit Duka: Osman Myderrizi orientalist i shquar shqiptar

– Akad. Albert Doja: Osman Myderrizi, një pionier i harruar i qasjeve shkencore në studimet shqiptare

– Phd. Enika Abazi: Osman Myderrizi, një jetë mes njerëzve të mençëm

Osman Myderrizi ka qenë studiues, mësues e veprimtar politik. Ai lindi në Tiranë ku kreu dhe studimet në shkollën pedagogjike dhe në vitet 1913–1922 ka punuar si mësues e drejtor shkolle.

Në vitin 1920 ka drejtuar gazetën “Zani i ri” që dilte në Tiranë. Dy vjet më vonë u zgjodh deputet i qarkut të Durrësit, ndërsa më 1924-n u zgjodh përfaqësues i Tiranës në Asamblenë Kushtetuese.

Pas një kohe të shkurtër mërgimi, në vitet 1929–1947 ai u rikthye në atdhe dhe punoi me detyra të ndryshme në arsim. Veç shkrimeve me karakter metodiko-mësimor për nevoja të shkollës O.Myderrizi hartoi tekstin “Gramatika e re e shqipes: – fonetikë e morfologji” (1944). Më pas ishte punonjës shkencor në Institutin e Shkencave, ku mori pjesë në komisionin hartues të “Fjalorit të gjuhës shqipe” (1954) dhe u mor me gjurmimin e letërsisë së shkruar me alfabetin arab, si edhe me studimin e botimin e saj. Këtë punë e vijoi edhe në Institutin e Historisë dhe të Gjuhësisë. Ai ka meritën e zbulimit të disa autorëve bejtexhinj dhe të transkriptimit e të studimit të teksteve të tyre. Studimet e tij në këtë fushë u përgjithësuan në monografinë “Letërsia shqipe me alfabet arab”. Vitet e fundit ai u mor me përgatitjen e botimit kritik të teksteve të kësaj letërsie. Në fushën e leksikografisë Osman Myderrizi përgatiti botimin kritik të fjalorit të Hafiz Ali Ulqinakut (1965). Ai ka dhënë ndihmesë edhe në diskutimet për çështje të veçanta të historisë së Shqipërisë.