Akademik Petraq PILIKA

Petraq PILIKA (1924–2009) Matematikan, profesor, akademik, “Mësues i Popullit”. Lindi në Korçë, ku kreu dhe Liceun Kombëtar (francez). Mori pjesë aktive në Lëvizjen ANÇ që në fillimet e saj dhe në Luftën ANÇ. U diplomua në degën e matematikës të Universitetit “Lomonosov” të Moskës (1946–1951). Më 1951 u emërua përgjegjës i katedrës së Matematikës e të Fizikës në Institutin e Lartë Pedagogjik të Tiranës. Me themelimin e UT u emërua përgjegjës i katedrës së Matematikës në Fakultetin e Shkencave Natyrore, të cilën e drejtoi për 31 vjet. P.P. nxiti kërkimin e mirëfilltë shkencor dhe e orientoi drejt në hapat e parë të tij në disa fusha me perspektivë për rritjen e nivelit shkencor të mësimdhënies dhe për zbatime në fusha të tjera. Kreu studime të rëndësishme në fushën e teorisë së funksioneve, botuar në revista të vendit e të huaja. Në v. ‘70 luajti rol kryesor në përvijimin e strategjisë së zhvillimit perspektiv matematik. Ishte organizatori kryesor i dy konferencave kombëtare për matematikën (1984, 1989). Ka qenë përfaqësues i Shqipërisë në disa forume shkencore ndërkombëtare dhe pjesëmarrës në kongreset botërore të matematikës (Nisë, 1970; Helsinki, 1978).