Vizitë zyrtare e delegacionit kinez të Aleancës së Organizatave Ndërkombëtare të…

Më 28 mars 2025 në ambientet e Akademisë së Shkencave të Shqipërisë (ASHSH) u zhvillua një takim zyrtar me delegacionin kinez të Aleancës së Organizatave Ndërkombëtare të Shkencës (ANSO).

Delegacioni kinez u prit nga përfaqësues të ASHSH-së, kryesuar nga akad. Anila Hoda, sekretare shkencore e ASHSH-së; akad. Genc Sulçebe, drejtues i Qendrës Kërkimore të Bioteknologjisë dhe Gjenetikës; akad. Ilia Mikerezi bashkëkryetar i Komisionit të biologjisë, bujqësisë dhe veterinarisë; prof. dr. Vjollca Ibro, anëtare e Komisionit të biologjisë, bujqësisë dhe veterinarisë; prof. asoc. Valbona Kolaneci, anëtare e Njësisë së pasurive ujore; prof. asoc. Gjon Boriçi, studiues, Instituti i Historisë dhe prof. asoc. Elda Zotaj, drejtuese e zyrës së marrëdhënieve me jashtë dhe publikun.

Delegacioni kinez përbëhej nga 7 anëtarë, prof. Bai Chunli, president themelues i ANSO-s; akademik i Akademisë Kineze të Shkencave (CAS); z. Jia Bo, zëvendësdrejtor ekzekutiv, sekretariati i ANSO-s; prof. Ye Yang, zëvendësdrejtor i përgjithshëm, Instituti i Mjekësisë Materiale, Shanghai, Akademia e Shkencave e Kinës; dr. Ning Bolun, drejtor i Divizionit të Çështjeve Europiane, Zyra e Bashkëpunimit Ndërkombëtar, Akademia e Shkencave e Kinës; z. Li Zhangwei, sekretar i presidentit Bai Chunli, Departamenti i Administratës së Përgjithshme, Akademia e Shkencave e Kinës; dr. Li Qian, Oficer i Programit, sekretariati i ANSO-s; z. Xu Shengjie, kryetar dhe president i Puyuan Holdings Group. Prof. dr. Sokol Abazi ishte gjithashtu pjesëmarrës në takim dhe shoqëronte delegacionin kinez.

Takimi kishte për qëllim diskutimin mbi prioritetet dhe iniciativat kërkimore të të dyja institucioneve, si dhe mundësitë për të krijuar ura bashkëpunimi në fusha të ndryshme të shkencës, përfshirë inovacionin dhe teknologjinë. Po ashtu, u diskutua rreth mundësive të bashkëpunimit në mobilitetin e stafit kërkimor, rinovimin e një marrëveshjeje bashkëpunimi midis Akademisë së Shkencave të Shqipërisë dhe Akademisë së Shkencave të Kinës, si dhe iniciativat për projekt-ide në fushat shkencore.

Në fjalën e saj akad. Hoda, në emër të kryesisë, u uroi mirëseardhjen dhe shprehu falënderimet për interesin e shprehur për të vizituar Akademinë e Shkencave. Ajo tha se ky është një takim shumë i rëndësishëm dhe një mundësi e madhe për të diskutuar bashkërisht potencialet që ekzistojnë mes dy institucioneve, si dhe për ta çuar në një nivel tjetër bashkëpunimin mes tyre. Ajo i njohu të pranishmit me përbërjen e delegacionit të ASHSH-së dhe fushat respektive të kërkimit shkencor që ata drejtojnë.

Në fjalën e tij, kreu i delegacioni kinez prof. Bai Chunli u shpreh se ndihej i nderuar, që në këtë vizitë të parë në vendin tonë ka mundësinë të njohë dhe diskutojë me përfaqësues të Akademisë së Shkencave të Shqipërisë për të gjetur pika të përbashkëta në zhvillimin e bashkëpunimit shkencor mes dy palëve. Ai bëri një prezantim të delegacionit që kryesonte dhe u ndal në paraqitjen e një panorame të institucionit që ai përfaqëson. Ai tha se ANSO është një organizatë ndërkombëtare shkencore jofitimprurëse, e themeluar në vitin 2018 nga Akademia Kineze e Shkencave dhe 36 institucione të tjera globale dhe aktualisht ka 78 anëtarë. Kjo organizatë është krijuar për të promovuar zhvillimin e përbashkët dhe të qëndrueshëm, duke ndihmuar avancimin e objektivave të zhvillimit të qëndrueshëm të Kombeve të Bashkuara (SDG), përmes bashkëpunimit ndërkombëtar në fushat e shkencës, teknologjisë, inovacionit dhe ndërtimit të kapaciteteve (STIC). Fokusi i saj është në adresimin e sfidave shkencore globale dhe rajonale, duke mbështetur ndërtimin e kapaciteteve shkencore të Jugut Global përmes partneriteteve me vendet dhe institucionet anëtare. Qëllimi i ANSO-s është të krijojë një platformë bashkëpunimi të hapur dhe gjithëpërfshirëse, që nxit komunikim dhe bashkëpunim shkencor të thelluar dhe ndihmon zhvillimin e rajoneve, të një brezi, një rruge, duke kontribuuar në krijimin e një komuniteti global me një të ardhme të përbashkët.

Në vijim të takimit akad. Hoda bëri gjithashtu një prezantim të misionit e strukturës së Akademisë së Shkencave. Ajo i njohu me reformën e zhvilluar vitet e fundit, që u kurorëzua me bashkimin e instituteve pranë kësaj akademie dhe ngritjen e qendrave dhe njësive të përhershme e të përkohshme, si dhe ngritjen e Akademisë së të Rinjve. Gjithashtu u theksua ngritja e komisioneve në përbërjen e të cilave janë figura të spikatura të shkencës si dhe stafe akademike të institucioneve të arsimit të lartë në vend. Më tej bëri një prezantim të lidhjeve që ka ASHSH-ja me institucionet dhe organizatat ndërkombëtare. ASHSH-ja është anëtare e institucioneve prestigjioze si ALLEA (All European Academies), ISC (International Science Council), etj.

Sekretarja shkencore e ASHSH-së foli edhe për realizimin e tri projekteve të mëdha: Fjalori i madh i gjuhës shqipe, Enciklopedia shqiptare dhe Historia e shqiptarëve. Ajo e prezantoi delegacionin kinez me rolin dhe funksionin e qendrave dhe njësive kërkimore pranë Akademisë së Shkencave dhe e vuri theksin te puna kërkimore shkencore e zhvilluar nga Qendra e Biotekonlogjisë dhe Gjenetikës dhe Qendra Nano Balkan. Shkencëtarët e këtyre qendrave kanë dhënë kontribute në rrjetin e shkencëtarëve europianë me vendosjen e bashkëpunimit me qendra homologe të kërkimit shkencor në rajon, në Europë e më gjerë.

Të dyja delegacionet diskutuan për prioritetet dhe aktivitetet kërkimore të tyre, duke u ndalur në mundësitë për krijimin e partneriteteve të reja. Po ashtu, u theksua rëndësia e bashkëpunimit në fushat që ndërlidhen me teknologjinë, inovacionin dhe zhvillimin e kapaciteteve shkencore.

Ky takim shënon një hap të rëndësishëm drejt zgjerimit të bashkëpunimeve ndërkombëtare dhe fuqizimit të lidhjeve mes dy institucioneve në fushën e kërkimit dhe shkencës, dhe krijon mundësinë për të forcuar më tej marrëdhëniet midis Shqipërisë dhe Kinës.