U zhvillua mbledhja e Komisionit të fizikë-kimisë
Në datën 26 mars 2025 u zhvillua mbledhja e Komisionit të fizikë-kimisë.
Në takim morën pjesë akad. emeritus Floran Vila, akad. asoc Besnik Baraj, akad. Neki Frashëri (online), akad. Mimoza Hafizi (online), prof. dr. Rozana Troja, prof.dr. Petrit Zorba, prof. dr. Elida Bylyku, prof. dr. Partizan Malkaj, prof. dr. Fatos Ylli, prof. dr. Elda Marku, prof. asoc. Shaniko Allajbeu, prof. asoc. Klaudio Peqini, prof. dr. Spiro Drushku, prof. asoc. Florian Mandija (online).
Mbledhja u hap nga kryetari i Komisionit akad. emeritus Floran Vila, i cili paraqiti programin e punës së Njësisë së kërkim-studimit “Pasuritë ujore” dhe kërkesën për zgjatjen e afatit të saj për periudhën 2-vjeçare.
Akad. asoc. Besnik Baraj, drejtuesi i Njësisë së kërkim-studimit “Pasuritë ujore”, foli për objektivat e vëna në periudhën e parë maj 2023 – dhjetor 2024, të cilat kishin si qëllim mbështetjen dhe intensifikimin e menaxhimit të qëndrueshëm dhe të integruar të ujërave në vend. Puna e njësisë u fokusua në tri drejtime: së pari, evidentimi i problematikës që ekziston në sektorin e ujërave; së dyti, njohja e forcimi i kapaciteteve të grupeve shkencore në institucionet e arsimit të lartë dhe së treti, krijimi i platformës së dialogut ndërmjet përfaqësuesve të komunitetit shkencor dhe institucioneve administrative e politikbërësve. Më tej, ai paraqiti planifikimin e veprimtarive dhe projekteve për vitin 2025 dhe planifikimin e përafërt për vitin 2026.
Në këtë takim u diskutua për masat ndërmarra për organizimin e aktiviteteve të propozuara për 6- mujorin e parë të 2025-s.
Akad. emeritus Vila paraqiti aktivitetet e Institutit Kombëtar të Fizikës (IKF) për 6- mujorin e parë të 2025-s, ku theksin e vuri në organizimin e Konferencës së tretë shkencore që do të mbahet në datat 2-3 qershor 2025, në vijim të traditës së krijuar prej disa vitesh. Qëllimi i kësaj konference është mbështetja e shpërndarjes së rezultateve të kërkimit shkencor në sfondin e arritjeve më të fundit në fizikë, përfshirë këtu dhe mësimdhënien; konsolidimin e rrjetit të bashkëpunimit mes fizikanëve shqiptarë e joshqiptarë si dhe zgjerimin i IKF-së me anëtarë të rinj. Duke qenë se 2025-a është shpallur Viti Ndërkombëtar i Teknologjisë Kuantike, konferenca synon gjithashtu të ketë në fokusin e saj arritjet madhore në këtë fushë të zhvillimit të fizikës.
Prof. dr. Rozana Troja, në emër të grupit të punës të ngritur nga komisioni, paraqiti përgatitjet që po bëhen për forumin e planifikuar në datën 28 maj 2025 lidhur me studimet e ciklit të tretë (doktoratura për fizikë dhe kimi) në institucionet e arsimit të lartë, si dhe disa nga arritjet dhe problematikat.
Kjo përqasje ndaj këtij problemi madhor në studimet pasuniversitare bëhet edhe në vijim të detyrimit ligjor për akreditimin e programeve të studimit të ciklit të tretë.
Në pikën e fundit të rendit të ditës u trajtuan çështjet themelore të njësive të kërkim- studimit në programet e tyre të punës.
Akad. Vila propozoi që në përfundim të projekteve është e nevojshme të planifikohet konferencë, simpozium apo forum, ku të diskutohet për arritjet dhe aplikimet e projektit, si dhe për t’ua bërë të njohura rezultatet e tij përdoruesve të mundshëm.
Prof. dr. Petrit Zorba shprehu mendimin për organizimin e një veprimtarie në fushën e meteorologjisë dhe ndikimeve klimaterike.
Të gjithë anëtarët e komisionit shprehën dakordësinë për organizimin e një veprimtarie me rastin e 100- vjetorit të fluturimit të parë ajror në Shqipëri, në lidhje me fenomenet e meteorologjisë dhe aviacionit.