Takimi i projektit “Slow Memory” Cost Action CA20105 në Tiranë
Sot më 26 mars 2025 u zhvillua dita e parë e takimit të grupit kryesor të projektit “Slow Memory”. Takimi i Tiranës është organizuar nga Qendra e Studimit të Arteve (ASHSH).
Ky projekt vë në qendër nevojën e rritjes ndërdisiplinore në të kuptuarin sesi shoqëritë përballen me të shkuarën e tyre, ndërsa përballen edhe me ndryshimet ekonomike e shoqërore që vijnë nga ngjarje të papritura dhe shndërrime të paimagjinueshme. E ardhmja e paqes, mirëqenies, politikës, punës dhe klimës varen nga mënyra se si i kujtojmë ndryshimet socio-kulturore dhe politike.
Dr. Anxhela Çikopano (organizatore e takimit të Tiranës, së bashku me prof. asoc. dr. Elsa Skënderin Rakipllarin, UT, dhe dr. Gilda Hoxhën, UMSH) mbajti fjalën e mirëseardhjes dhe bëri prezantimin e agjendës. Ajo vuri në dukje se praktikat transformuese të kujtesës si objekt studimi dhe si ndërhyrje kritike, ndahen midis arteve dhe shkencave, me qëllim që të zbulohen mënyrat sesi njerëzit përballen me proceset e ndryshimeve në shkallë të gjerë. Më tej, ajo theksoi se projekti përqendrohet në mënyrë unike në vëmendjen e studiuesve, politikëbërësve dhe profesionistëve kulturorë te rrugët alternative për të ndërtuar qëndrueshmëri përballë kulturës së shpejtë bashkëkohore.
Më pas u bë takimi i ekipit drejtues, ku foli drejtuesja e projektit dr. Jenny Wustenbeg. Gjatë tri ditëve grupi do të organizojë një sërë vizitash në institucionet e kujtesës në Tiranë dhe do të njihet me historinë e artit shqiptar.
Pjesëmarrësit vijuan sipas programit me prezantimin e Tiranës dhe zhvilluan turneun e kujtesës mes pikave të rëndësishme të Tiranës, me një guidë nga prof. asoc. Andi Pinari, ku përfshihej edhe një vizitë në Muzeun e Gjetheve.
Më pas u zhvillua një panel me aktivistë të kujtesës: Vincent W.J. van Gerven Oei për projektin e lapidarëve, Erald Kapri për kujtesën e komunizmit me kujto.al, Rezarta Caushaj për objekte të shkatërruara të qytetit (Teatri Kombëtar, Stadiumi “Qemal Stafa”, etj.).
Përgjatë tri ditëve, të pranishmit në këtë veprimtari nga Shqipëria dhe vende të tjera të botës si Franca, Mbretëria e Bashkuar, Kroacia, Serbia, Danimarka etj., përmes diskutimeve mes shteteve dhe ndërdisiplinore, do të trajtojmë çështjet e ngutshme, krizat dhe përshpejtimin duke bashkuar fenomenet shumëvendëshe “pa ngjarje” dhe me lëvizje të ngadaltë, të cilat mund të studiohen më së miri duke ‘ngadalësuar’ metodat tona kërkimore, për të mundësuar ndërtimin e kapaciteteve, gjenerimin e dijes dhe aktivitetet me ndikim. Frymëzuar nga koncepti i ‘shkencës së ngadaltë’ (Stengers 2018), ata janë në kërkim të një alternative të kujtesës për të zhvilluar teori dhe metodologji që trajtojnë kujtesën e ngadaltë përmes bisedave ndërdisiplinore dhe angazhimit me aktorët e interesit. Për këtë projekt janë bërë takime të rregullta, si virtualisht ashtu edhe personalisht.
Takimi i Tiranës do të vijojë deri më 28 mars 2025.