Më dt. 24 mars 2025, ora 11:00, në sallën “Aleks Buda” të Akademisë së Shkencave të Shqipërisë zhvillohet promovimi i librit, Enciklopedi e filmit shqiptar (1904 – 2022): Historia e Shqipërisë në syrin e kamerës (Botimet Jozef, 2025), nga znj. Irini Asqeriu.
Ky botim, i cili dallon për ambicien për të qenë sa më shterues, hedh një vështrim të gjerë mbi një sërë aspektesh të ndërthurura të kinematografisë shqiptare që nga fillimi i shekullit të kaluar e deri më sot. Kështu, në të përfshihet jo vetëm fondi i filmit artistik por edhe ai i filmit të animuar, i filmit dokumentar dhe atij kronikal. Krahas tyre, janë pasqyruar edhe punët e diplomës që kanë realizuar studentët shqiptarë të filmit brenda dhe jashtë vendit, si dhe filmat e ndaluar por edhe skenarët që nuk u realizuan kurrë. Një vëmendje e veçantë i është kushtuar edhe kuadrit institucional të zhvillimit të kinematografisë në vendin tonë: nga krijimi i shoqërive të para kinematografike, te ndërtimi i rrjetit të kinemave në vend, krijimi dhe veprimtaria e studiove të ndryshme filmike, organizimi i festivaleve të filmit, e kështu me radhë. Nuk mungon as treguesi emëror i të gjithë atyre që kanë punuar për kinemanë shqiptare, jo vetëm në kapacitete krijuese por edhe në kapacitete teknike e mbështetëse, çka është mjaft e rëndësishme.
Përveç autores, në këtë promovim do të marrin pjesë edhe prof. asoc. Merita Sauku-Bruci (konsulente shkencore) dhe Natasha Lako (recensente). Takimi do të moderohet nga dr. Jonida Gashi (Qendra e Studimit të Arteve).
