Ndahet nga jeta aktorja e mirënjohur shqiptare Margarita Xhepa

Me dhimbje të thellë Kryesia e Akademisë së Shkencave të Shqipërisë dhe Komisioni i Përhershëm i Arteve përcjell ngushëllimet për ndarjen nga jeta të aktores Margarita Xhepa, një figurë madhore e teatrit dhe ekranit në hapësirën mbarëshqiptare.

Aktorja Margarita Xhepa ka dhënë një kontribut të jashtëzakonshëm në fushën e artit me mbi 150 role në teatër e mbi 30 në kinematografi. Ajo do të ngelet e paharruar jo vetëm si një artiste e madhe, por edhe si një grua fisnike e me shumë vlera.

Një pjesë e rëndësishme e trashëgimisë artistike janë rolet e paharrueshme të kinematografisë, si te “Vitet e para”, “Dimri i fundit”, “Tokë e përgjakur”, “Një djalë edhe një vajzë”, “Apasionata”, “Gjeneral gramafoni”, “Rrethi i kujtesës”, “Gjurma”, “Vitet e pritjes”, “Dora e ngrohtë”, “Gurët e shtëpisë sime”, “Pranvera s’erdhi vetëm”, “Koncert në vitin 1936”, “E diela e fundit”, “I dashur armik” etj. Gjithashtu, po aq të paharrueshme janë edhe rolet e saj në teatër, si te “Hamleti”, “Mbreti Lir”, “Romeo e Zhuljeta”, “Rikardi III”, “Intrigë e dashuri”, “Morali i zonjës Dulska”, “Lumi i vdekur”, “Kush e solli Doruntinën”, “Dhelpra dhe rrushtë”, “Xhaxha Vanja”, “Luiza Miler”, “Vizita e inspektorit”, “Vdekja e një komisioneri”, “Revizori”, “Qeni i kopshtarit”, “Elektra” etj, etj.

Si një ndër aktoret e para shqiptare, kjo aktore që mban titullin “Artiste e Popullit” dhe “Nder i Kombit” do të mbetet një prej gurëve të themelit të ngritjes së artit të aktrimit në Shqipëri dhe një pikë reference për artistët e rinj.

Kryesia e Akademisë së Shkencave të Shqipërisë.

Tiranë, 3 prill 2025